قرات الجزء الاول ولا لسه اقراه من هنا
نروح لباقي اجزاء الممر التنفسي
الحنجره :-هي ممر قصير للهوا بين البلعوم والقصبه الهوائيه وهيا الجزء المسؤول عن اصدار الصوت في الانسان
-الحنجره دايما بتكون مفتوحه لان زي ما قولنا ان النسيج الضام او ال lamina propria بتكون متصله بال perichondrium بتاع الغضروف اللي تحتها
-نتعرف الاول علي مكونات الحنجره عشان نبدا بعد كده نعرف ازاي بتطلع الصوت
اجزاء الحنجره او larynx
لسان المزمار -epiglottis
الاحبال الصوتيه -vocalcords
بس كده انتا عاوز تاني ولا ايه كفايه كده حلو
نروح للجزء الهستولوجي في الموضوع
-زي ما قولنا ان الممر التنفسي معظمه متغطي بال respiratory mucosa بس مقولناش كله
-الحنجره بردو كلها متغطيه بنفس الغشاء ماعدا حتتين صغننين اد الفسفوسه كدهو :-
1-الجزء الامامي من لسان المزمار -epiglottis
2-الاحبال الصوتيه الحقيقيه -true vocal cords
-بيكونو متغطيين بطبقه تانيه من النسيج الطلائي وهيا (non keratinized stratified squamous epithelium )
-هتقولي طب ايه السبب مميزين ليه يعني عن الباقي :-هقولك كلمه واحده عشان يحمو نفسهم
طب من اي !!!!!
-احنا كنا بنقول ان الممر التنفسي بيكون متغطي ب respiratory mucosa واللي النسيج الطلائي اللي فيها بيكون (Pseudostratified ciliated columnar epithelium with goblet cells) يعني مجرد طبقه واحده ممكن تتشرخ تبوظ يحصلها اي حاجه بس كان مستبعد في الممر التنفسي لان العوامل اللي بتعمل كده قليله في الممر التنفسي
لكن
-الجزء الامامي من لسان المزمار معرض للفم والاكل اللي في الفم اللي ممكن يكون حراق او حامضي او حاجه تانيه الله اعلم بيها فلازم حاجه تحميه
-هتقولي طب ده في لسان المزمار وعشان الاكل بييجي عليه مال الاحبال الصوتيه بالموضوع ومفيش حاجه بتيجي عليها
-دايما مستعجل كده وعاوز تعرف كل حاجه منا جايلك في الكلام اهو
-الاحبال الصوتيه الحقيقيه او ال true vocal cords بتكونت متغطيه بنسيج طلائي مختلف لان الاهتزازات اللي بتنتج عنها عشان تطلع الصوت كفيله انها تموت الخلايا وتبوظها وتتعبها فلازم تبقي مختلفه عشان تقدر تعيش يبني
-هتقولي انا كده تمام فهمت كتر خيرك يسطا منجليكش في حاجه وحشه
-بس تقوم ترجعلي تاني كده وتقولي بس خد هنا تعالي
-انتا عمال تقول احبال صوتبه حقيقيه احبال صوتيه حقيقيه وانا ساكلتك
-هوا فيه احبال صوتيه مش حقيقيه
-اقولك ايوه يزميلي فيه
-تقولي انا تهت منك ممكن تفهمني الصوت بيطلع ازاي عشان امشي وانجز نفسي
-خلاص يعم هظبطك خلي بالك انا مستحملك بس عشان بحبك
-زي اخويا
-هروح الاول للحته اللي انتا تهت مني فيها وهيا الحبال الصوتيه ايه اللي فيها وهل هيا احبال بجد ولا اي
-الحبال الصوتيه عباره عن 4 حتت لحمه هما اللي بيطلعو الصوت هما اي بقي ال 4 لحمات دول
1- زوج من الاحبال الصوتيه الحقيقيه - true vocal cords او vocal folds
2- زوج من الاحبال الصوتيه الكذابه الوحشه اللي هتروح النار - false vocal cords او vestibular folds
-الصوت بيكون عباره عن ان الهوا بيطلع من الجسم او من الرئه يعني يخش يعدي علي الاحبال الصوتيه الحقيقيه اللي هيا حته لحمه وفيها elastic fibers عشان تنكمش وتتمد ومن اهتزاز حته اللحمه ده لما الهوا يعدي عليها بيطلع الصوت
-تقولي بس انتا اتقفشت كده اي فايده ال false vocal cords
-بص كده للصوره دي
-بصيت ؟
-حته اللحمه اللي فوق هيا الحبال الصوتيه الكاذبه واللي هيا تحت الحبال الصوتيه الحقيقيه
-شايف اي بينهم
-هتقولي مش شايف حاجه شايف حته فاضيه
-هقولك بالظبط في فراغ بينهم وده اللي عاوزينه يكون فيه فراغ عشان يحصل رنين اعلي والصوت يبي اعلي ونقدر نتحكم في طبقات الصوت ففايده الاحبال الكاذبه انها تخلق فراغ بينها وبين الحبال الحقيقيه ونعمل الرنين
بس كده يخويا الحنجره خلصت
-ادعيلي بقي
ادعي يلا متستهبلش شايفك
